تجارب التقديم - تجربة احد المتابعين مع التقديم للكلية الحربية



سنة 2012 و 2013 قدمت عالكليه الحربيه سحبت ملفي ومليته بالمعلومات اللازمه وطبعا بمساعدة والدي بيشتغل (سكرتير بقسم شؤون ظباط مديرية أمن سوهاج) طبعا كان ليه معارفه لانه خدم في الشرطه اكتر من 27 سنه ف المهم ..
قدمت وتمام وروحت وقدمت في المنطقه الجنوبيه العسكريه(منقباد) وأخدو طولي ووزني واستلمت كارنيه أخضر لونه وصغير كده واتحط في الملف وقولت علي بركة الله بعدها حلقو لينا شعرنا زيرو مش واحد حتي .. وصورونا وأمتحنوني قدرات (أسأله عامه وكده) وطبعا قالو هيبلغونا بالنتيجه علي الموبايل ..بعد كام يوم تقريبا 12 يوم بعتولي رساله اني نجحت وأجي يوم كذا كذا عشان الكشف الطبي الأول وبالفعل روحنا عشان الكشف الطبي وتم تحويلي للمكان المختص مش فاكره بس تقريبا في حلمية الزيتون وبتركب مترو خط المرج حلوان او حاجه زي كده ولابس بوكسر ابيض سبعه هتلاقي ست واكتر من شخص بيبيعه بره المهم كشفت جراحه ونظر ومسالك بوليه وباطنه وحاجات كتير وعديت الحمدلله سليم 100% اخدنا معاد للاختبار الرياضي وروحنا بعدها يايام قليله برضو الحمدلله اجتزت كل الاختبارات بدون أي مشاكل كده فاضل (كشف الهيئه) او اختبار السمات الشخصيه وبعده (العرض الطبي العام) يوم كشف الهيئه لبست قميص أبيض نص كم وبنطلون أسود وحزام سيمبل (بسيط ورفيع كده) وجزمه سوده ولازم تكون نزيه شكلا ولبسا واخلاقا حتي لو بالكدب .. المهم تعدي الليله دي علي خير
سألوني اسأله عاديه خالص بعد ما عرفتهم بنفسي وبشهادتي ومجموعي وبلدي والحاجات الفكسانه دي .. المهم بعد ما خلصو اسألتهم زاولوني ورازو فيا شويه هتقولي مش فاهمك بس هفهمك بالبلدي كده بيشوفوك صاحي ولا متغفل 😉 مثلا اقفل الباب وراك وانتا طبعا بتكون قافله اصلا وانتا داخل / او يقولك اربط رباط جزمتك اليمين / زرر القميص بتاعك ههههههه شغل الحوارات ده فخليك مركز بعد كل ده ملقيوش فايده معايا فكنت صايع في اللحظه دي من لواءات قاعدين قدامي مترصصين واغتمنت الفرص لما لقيتهم ابتسمو ولو التسامه خفيفه كده وسألت اكبر رتبه فيهم ومكنتش اعرف اسمه لغاية ما كلمه عميد جمبه بيقولو شكله مقبول يا عمر بيه فكلمته برتبته واستأذنته كان لواء اركان حرب شكله شديد في المعامله وممكن يخليني اسقط واروح بيتنا اتشجعت وكلمته بصوت مسموع مينفعش توطي صوتك وتتمايص (لو سمحت سيادة اللواء عمر انا مهيء لدخول الكليه الحربيه ونفسي أخدم بلدي واكون عمود اساسي في الكليه الحربيه وليا أسمي وابقا ف يوم مكان سعادتك فلو تكرمت مترفضنيش انا مجموعي كبير(كان مجموعي 89.5%) وجسديا ونفسيا مناسب لدخول الكليه ولو أترفضت من هنا مش هدخل أي كليه تانيه لان حلم حياتي اني اقلع الملكي والبس الميري ) تقريبا من الضغط النفسي عليا والارتباك قولت الكام كلمه دول في دقيقه بحالها عشان يفهموني لقيتهم ضحكو ضحكه خفيفه وبصو لبعض راح جاوبني عمر بيه وقالي بص يا كابتن احمد احنا تقريبا محدش معارض دخولك الحربيه وخدمه بلدك ونتمنالك التوفيق .. سكت ومشيت (أي اوامر تاني يافندم !!!) سحبت الباب في ايدي وفضلت ماشي زي العسكري ثابت ألف لان فيه كاميرات في كل مكان عشان يشوفو المرتبك واللي خايف وثقته في نفسه كده انا ماشي من كشف الهيئه عارف أني اتقبلت وقولت لأبويا وفرحته وقولتله خلاص كده ابنك بقي ظابط حربيه وغيرت أسم ايميلي خليته (ظابط حربيه والفخر ليا) عشان خلاص حسيت اني اتقبلت روحت العرض الطبي العام اللي فاكره انه كان يوم 13 في الشهر كان بحضور عصمت مراد عميد ورئيس الكليه الحربيه ووزير الدفاع حاليا وهو هو نفس الكشف الطبي بس بيكون علي مستوي أعلي وأدق في تفاصيله .. الحمدلله اليوم عدي علي خير واخدنا فرصه نستني النتيجه والدي كان مكلم عمه وده عميد في الكليه الجويه سابقا وناس تانيه كتيره من معارفه وطبعا حصل الغير متوقع قبل النتيجه بيومين وطلبو 250الف جنيه مننا ومن عم والدي وبلغنا ان النتيجه فاضل يومين عليها وتتصدق واللي طبخ طبخ .. واللي خبز .. خبز
لفينا حوالين نفسنا بيعنا جزء من ارضنا قيراطين برخص السعر عشان نجمع المبلغ سافرنا مصر تاني يوم عشان النتيجه روحنا مقر الكليه الحربيه في مصر الجديده ... سلمنا المبلغ لشخص معرفهوش يعرفه والدي وعمه وتاني يوم اتصدق عالنتيجه وانا مكنش أسمي من ضمن الناس دي وزعلت جدا وعملت تظلم وكنت هرمي نفسيا تحت المترو انا ومروح .. رحنا أنا وعم بابا لرئيس هيئة القضاه والنيابه العسكريه اللواء /م.ع.م وقبل ما ندلخه اتفتشنا تفتيش ذاتي محرج جدا وطلعناله كلمناه قال مفيش بايدي حاجه وده نصيبك ارضي بيه وقدم السنه الجايه ... سكت واتصدمت واسترجعنا فلوسنا الحمدلله مضاعتش ومسكت ملفي أقدم علي كليه كان المعاد فات برضو ودخلت شريعه وقانون اسيوط ومقدرتش اكمل فيها وفضلت بفكر واقول ليه كل ده يحصلي وكذا وكذا كانت راحت السنه ومذاكرتش وممتحنتش وفشلت وفضلت اسقط كل سنه لغاية ماقولت لازم اسقط عشان اروح كليه في التربيه والتعليم بره الازهر خالص ..و .و حصلت حاجات تانيه كتير لو تحبو تعرفوها ولما قدمت السنه التانيه حصلي إيه ... اكتبو تعليق واكتبو اي استفسار او نصيحه وهنزل بوست تاني اشرح فيه اكتر واعذروني لو البوست طويل انا حبيت افيدكم عشان متقعوش في نفس اخطائي

3 تعليقات

  1. بص يا صبحى أنت شجاع وفيه مثل حلو بيقول ما زرع الله فى قلبك رغبة الوصول لأمر إلا ويعلم انك ستصل إليه فأكيد ربنا كرمك ووصلت نزل ال بوست عشان أستفيد من تجربتك والكل يستفيد

    ردحذف
  2. تمام يا باشا والله التجارب اللى بتنزلوها بتفيدنى كتير وتفيد ناس كتير غيرى

    ردحذف

إرسال تعليق